Jachíasu "Öou öomtihuame kaa Diosta justíciata yauhua"ti jíahua?

Ítapo jéntemmea bem öomtihuamta kaa riéndatuame násuk jojohua. Jachía büru jente júnëlituka?

Büru yore öómtituame problémam aayu! Áutom nau lópolame jukä rérejtihuamta mai obíachi yáak jémtem öomtitua. Juúbim bem kunámmak katim naut jünéaka nok nassua. Injustíciam éntok huaate chikti táapo hueeme yore öomtitua. Öomtihuame chëhuasu büruriaka jü jente kia pejte.

Krístota sau katemeu úttiapo yántipo tahuá majtíanake. Kethueeyo búsaka tü aktitúta bíttuaka tahuánake, éntok pasiénsiata éntok toleránsiata jípunake. Íkä béchïbo büru itom násukum famíliam itom nákeme jípure. Jumë Krístota sau kateme ámante nau yayájäjapo tü amíigom itom aníata mikríame jípure. Kette nákeme kabyérota jípure, Jehová Diosta. Juäri béchïbo senu razón öomte tahuä béchïbo bétanate búttiaritaka: yore toij máchirehuamta bétana.

«Buëituk áapo (jü Dios) ínel jíala: Káibune enchi tóijnake, éntokne káibu emchi kaa aníaka tahuáriatua"», Hebréom jïojteripo jiáu bénasi —Hebréom 13:6po [huoy mamni ama baijpo bersíkulo búsampo].

"In áchai éntok in aiye nee tóijnakëtuko, áaporihua, Jehová nee mabétäeyei"—titou jiahua jü Tü Jïojteri [Sálmompo 27:10po [senu taká ama huoy búsampo bersíkulo huoy mamnipo].

Itom alléehuamte éntok itom tü ínnehuamtate suayä béchïbo úttiapote jachin omtíriata manejároa jüneiya. Jáchisute ara íkä yauhua? Jü Biblia itom nok téjoa ínel jíakari:

"Jabe junne au kúptitua öomtë béchïbo chë türi juka yorem mai útiata jípuremta beppa; éntok jü ä espírituta riéndatuame chë türi siudatáta yekamta beppa". —Provérbiom 16:32po [huoy mamni ama búsampo bersíkulo senu taká ama huoy mamni ama huoyimpo].

Krístota sau kateme ömtihuamta yeká sáuhuehua! Tëte omítiriata kara yekätek aníatate jaría. Tekipánoaë huaate bet jünénakë béchïbo jachín bem jínel boojoriähui. Huäri itom emosiónim itom täya aníanake.

Jantúk itou ömteme lauti yántipo tahuánake itom am jíako "Ínapo at jüneiya jachíakasu em ínel emo ínneähui".

Jiókorihuamta nétanëpo itom jabe júneta ofendéroako ara ä yántituähui. Júnël jóakate ä dignitá yörihuamta bíbitu. Itom öomtek itou tüsi nok majtíanake. Katte juëna nookim noknake, katte insultároanake. Árate itom öomtihuamta bétana nooka. "Íkä nee jiókotituak" tíame chë türi "Empo kaa súaka" o "Empo estúpido" tíamta beppa.

Nok nássuahuame kaa türi. "Yómniahuamta yántituk öomtíahuamta omoute"tíame jü Biblia. (Proverbiom 15:1po [bais mamnipo bersíkulo huépülapo]).

Sïme yorémem kolopti öomte. Jehová junne öomte, éntok ítapo ä imájenpo bénasi kreároahuak. Të kaibu kia beja öomte, éntok áapo ä öomtíahuame yeyeka. Të ítapo kaa perféktotaka ëe.

Juári béchïbo Santiakko itom júnel nok téjoa:

"Íkärem täya, in sáilam in nákëhui: Sïme yoréme lauláutisi jíkaijnapo, lauláutisi nokäpo, lauláutisi öomtëpo tahuánake, buëituk yoremta öomtíahuame kaa Diosta justíciata yayahua".
—Santiakko 1:20 [huépülapo bersíkulo senu takapo]. Jáchisu jiaubaare ïi?

Itom imperfeksión ara kaa kontróleka aktuároatua. Juári béchïbo türi ïi princípiotau huáatëpo:

Kátem jujuche, emë in nákëu, tem öomtíahuamte omoute; buëituk júnel jïojtelataka öre: "Ínapo ä áteak jü jujuchihuame; ínapo nokta chupánake —tíame jü Jehová.