Bemela Jerusalemta Üsim Kaa Buíau Nótinake

1. Jume Diosta Nokríame Testíhuom téame majtía jume jínëutunakeme béchïbo huóyik destíinom ayúkähui: Huaate aman téhuekapo jóunake, huaate éntok im buíat jóunake.

2. Të huaate religiónim majtía buíata táanakëhui, éntok mil huásuktiapo táaka tahuánakëhui. Huanäi éntok jume jínëhuakame aman téhuekapo mil huásuktiapo jóunake; të chúkula beja bempo buíau kom nóttinake—tíamme.

3. Ímë religiónim bem majtíahuamta Revelaciónta líbropo, kapítulo senu taká ama huépülapo bersíkulom huoypo éntok baispo yeu huíkekatía. Ïi bersíkulom jínel jiahua:

"Juka santo bueuru puéblota ketne bíchak, juka Bemela Jerusalémta téhueka bétana kom huéyeïhui, Diosta bétana, éntok huïko-huíikta bénasi ä kuná béchïbo sehuátuaritaka lijtárotakähui. In huakä bíchäpo kusisi jiáutane jíkajak ínel jíamta: "Juyú! Diosta jöta yóremriamak öre, áapo éntok ámemak jóunake, bempo éntok ä puéblomtunake, éntok Dios alla ámemak annake".
—Revelación 21:2, 3

5. Itom junéepeak Bíbliata lútüriapo majtíäuta sïme huä Bíbliata senu asúntota bétana jíamta, kontéksto téamta, bit jípure.

6. Jíttasu jiáubaare "Diosta ámemak jóunakëhui" éntok "Ámemak annákëhuïbuan"? Jatchu Dios au bitchamatchi huakajta öoutuanake? Ëe. Dios espíritu; huäri béchïbo ítapo kara ä bitcha. Atä leéroanake jukä Éxodo líbro aa bétana jiäuta:

"Áapo [Jehová] éntok jiahuak: «Empo kara nee bitcha éntok jíabsaka junne tatahua".—Éxodo 32:20.

7. Junen béchïbo, jachin yorémriamak jü Dios "annake" éntok jachin téhueka bétana "kom huéenake" jü Bemela Jerusalem? Génesis senu taká ama huépüla bersíkulo huépüla ara itom at jünée aníanake. Ímë bersíkulom júnel jiahua:

"Jehová éntok ä súhuahuamta Saratau huéetuak ["visitároa"—tiamme huaate Biblia bersiónim] jíalataka bénasi, ensu Jehová Sarátamak yahua nokálaï bénasi".—Génesis 21:1

8. Jü Dios téhueka bétana kaa kom huée necesitároak Sarata asoa mikría béchïbo. Áapo juka nokta kia bíttuak.

9. Éxodo kapítulo naiki aman bersíkulo huoy taká ama huoy mamni ama huépülapo ket itom at jünée anía jittasu "kom huénake"—ti jiáubarëhui.

"Íkäri bíchaka jü pueblo ä súaleka taáhuak. Jíkajäpom Jehovata ä súahuamta Israel üsimmeu huéetuak [visitároak", huaate versiónim jiáu bénasi] éntok ä bem jiókotihuamta bítlaïu chákakteka bem pújbam buíau kom yumaria".—Éxodo 4:31

10. Dios Israelta "visitároak" kaa buíau kom huéeka, të Móisesta jínëukamta bénasi ámeu bíttuaka.

11. Ensu árate Revelación 21:2, 3ta at jünéiya. Ïi pasájeta kaa Diosta kom huéenakëu jiáubaare. Dios yóremria "visitároanake", "áamak annake" Bemela Jerusalem téhuekapo anemta pámani, éntok aa paman jume tü yorémem úttesi teöchíatunake.

12. Ïri yóret jünéehuame lútülatukähui Provérbiom 2:21, 22 [Kap. huoóyim, bersíkulom senu taká ama huépüla éntok senu taká ama huoóyim] itom ä bittu ínel jíame:

"Jume lútula böot reréjteme ámëria jume buíat jóunakëhui, jume kaa kúlpakame éntok aa bepa tahuánake". —Provérbiom 2:21, 22.

13. Akë at suúhua ímë bersíkulom kaa tü yorémem buíau "nóttinakëtíä bétana" të tü yorémem buíat "tahuánakëtíä bétana".

14. Ilikki nokimpo jiari: Jü Bemela Jerusalem téhuekapo bétana yäura äjaria. Áapo jibäpo béchïbo aman annake. Të "buíau kom huéenake" Diosta teöchíahuame huéeriakä pámani.